ვინ ვართ?
ჩვენ ვართ BirdLife-ის, მსოფლიოს უმსხვილესი ბუნების კონსერვაციის ორგანიზაციის ადგილობრივი პარტნიორი.
საბუკოს მისიაა ველური ბუნებისა და ჰაბიტატების დაცვა, კონსერვაცია და აღდგენა საქართველოში; საზოგადოების მიერ ბუნების დაფასების გაზრდა და ბუნებრივი რესურსების მდგრადი გამოყენების წახალისება. ჩვენი ძირითადი ფოკუსებია:
სახეობებისა და ეკოსისტემების მონიტორინგი
კონსერვაციისთვის საჭირო ზომების შემუშავება
ცნობიერების ამაღლების კამპანიები
კონსერვაცია - კვლევები
კონსერვაციის გუნდი პასუხისმგებელია სტრატეგიების შემუშავებაზე, სახეობების და ჰაბიტატების კონსერვაციაში ხარვეზების გამოკვეთასა და შესაბამისი ქმედებების დაგეგმვაზე, მნიშნელოვანი ჰაბიტატების, პოპულაციებისა და ეკოსისტემების სიცოცხლისუნარიანობის შესანარჩუნებლად.
პოლიტიკა
პოლიტიკის გუნდს ევალება საკანონმდებლო და პოლიტიკის საკითხებზე ორიენტირებული გარემოსდაცვითი ადვოკატირება სახეობებისა და ჰაბიტატების კონსერვაციისთვის; საერთაშორისო პოლიტიკის საკითხების ინტეგრირება ეროვნულ დონეზე; ინფრასტრუქტურული პროექტების გზშ დოკუმენტების მონიტორინგი ველური ბუნების შენარჩუნებისთვის.
განათლება
განათლების გუნდი უძღვება ცნობიერების ამაღლების პროგრამებს სხვადასხვა სამიზნე ჯგუფებისთვის. გუნდი ცდილობს გაზარდოს ხალხის მიერ ბუნებრივი რესურსების გაგება და დაფასება. ისინი ამზადებენ სხვადასხვა ტიპის მასალას მასწავლებლებისა და სხვა განმანათლებლებისთვის.
კომუნიკაციები
კომუნიკაციების გუნდის მთავარი ამოცანაა ორგანიზაციის საქმიანობა გააცნოს მეტ ადამმიანს და გაზარდოს კონსერვაციის მხარდამჭერთა რიცხვი. ისინი ასევე უძღვებიან საბუკოს საწევრო პროგრამას და კამპანიებს.
